https://wici.porth.ac.uk/index.php?action=history&feed=atom&title=Zeitschrift_f%C3%BCr_celtische_Philologie 2026-05-21T19:42:58Z Hanes diwygio'r dudalen hon ar y wici MediaWiki 1.28.0 https://wici.porth.ac.uk/index.php?title=Zeitschrift_f%C3%BCr_celtische_Philologie&diff=2287&oldid=prev 2018-03-21T16:01:36Z

<p>Crëwyd tudalen newydd yn dechrau gyda &#039; &#039;&#039;Zeitschrift für celtische Philologie&#039;&#039; yw’r cylchgrawn cyfredol hynaf sy&#039;n ymroddedig i bynciau astudiaethau Celtaidd yn unig, gan ganolbwyntio ar y...&#039;</p> <p><b>Tudalen newydd</b></p><div><br /> ''Zeitschrift für celtische Philologie'' yw’r cylchgrawn cyfredol hynaf sy'n ymroddedig i bynciau astudiaethau Celtaidd yn unig, gan ganolbwyntio ar yr ieithoedd Celtaidd a llenyddiaethau ynddynt. Talfyriad arferol ei deitl (sy’n golygu ‘cyfnodolyn ar gyfer ffiloleg Geltaidd’) yw ''ZcP'' neu, yn fwy anffurfiol ac mewn cyd-destun astudiaethau Celtaidd, ‘y ''Zeitschrift''’. Mae ''ZcP'' yn cynnwys erthyglau ysgolheigaidd yn ogystal ag adolygiadau o lyfrau perthnasol i’r maes.<br /> <br /> Fe’i sefydlwyd yn 1896 gan yr ysgolheigion Celtaidd Almaenig adnabyddus Kuno Meyer (1858–1919) a Ludwig Christian Stern (1846–1911). Yn neilltuol yn ei flynyddoedd cynnar roedd prif ffocws ''ZcP'' ar ffiloleg Geltaidd yr oesoedd canol a’r hen fyd. Fodd bynnag, cynhwysir pob agwedd ar ieithoedd a llenyddiaethau Celtaidd o fewn ei rychwant, gyda nifer cynyddol o gyfraniadau sy’n ymwneud â’r ieithoedd modern. Rhwng 1921–67, fe’i golygwyd gan Julius Pokorny (1887–1970), o bosibl yr ieithydd Indo-Ewropeg mwyaf ei ddylanwad yn yr 20g. Olynydd Pokorny, hyd 1988, oedd Heinrich Wagner (1923–88), brodor o’r Swistir ac arbenigwr ar deipoleg ieithyddol a thafodieithoedd Gwyddeleg. Fe’i dilynwyd gan yr ieithydd hanesyddol Karl Horst Schmidt (1929–2012) tan 2008, ac wedyn, tan 2014, yr ysgolhaig Celtaidd Stefan Zimmer. Yn 2018 tîm [[golygyddol]] ''ZcP'' yw Jürgen Uhlich (Coleg y Drindod, Dulyn), Torsten Meissner (Caergrawnt) a Bernhard Maier (Tübingen). Dylai cyfraniadau a gynigir i’r cylchgrawn fynd at un o’r rhain. Er bod llawer o gyfraniadau, yn enwedig yn y cyfrolau cynharach, wedi’u hysgrifennu yn Almaeneg, cynhwysir erthyglau yn Saesneg a Ffrangeg, yn ogystal ag Eidaleg a Sbaeneg yn ''ZcP''. Yn wreiddiol, ymddangosodd yn flynyddol. Yn ddiweddarach, mae wedi ymddangos yn fwy afreolaidd gyda chyhyd â thair blynedd rhwng rhai cyfrolau. <br /> <br /> Mae’r cylchgrawn yn parhau i fod yn ganolog i ymchwilwyr sydd â diddordeb mewn astudiaethau Celtaidd, ac mae'r cyfrolau cynnar yn sefyll o hyd fel adnodd hanfodol; ceir ynddynt olygiadau heb eu disodli o destunau yn yr ieithoedd Celtaidd cynnar. Mae’r ''Zeitschrift'' yn tystio i wreiddiau Astudiaethau Celtaidd mewn ffiloleg Indo-Ewropeg yn ogystal â’i ddatblygiad fel disgyblaeth academaidd eang. Mae ei restr o gyfranwyr yn cynnwys y rhan fwyaf o ysgolheigion Celtaidd blaenllaw yr 20g. Mae gan y cylchgrawn gyfres gysylltiedig, y ''Buchreihe der Zeitschrift für celtische Philologie'', lle cyhoeddir ymchwil yn yr un maes.<br /> <br /> '''John T. Koch'''<br /> <br /> ==Llyfryddiaeth==<br /> <br /> Hellmuth, P. S. (2006), ‘Stern, Ludwig Christian’, yn Koch, J. T. (gol.), ''Celtic Culture: A Historical Encyclopedia'' (Santa Barbara a Rhydychen: ABC-Clio), t. 1627.<br /> <br /> Hellmuth, P. S. (2006), ‘''Zeitschrift für celtische Philologie''’, yn Koch, J. T. (gol.), ''Celtic Culture: A Historical Encyclopedia'' (Santa Barbara a Rhydychen: ABC-Clio), t. 1823.<br /> <br /> Löffler, M. B. (2006), ‘Meyer, Kuno’, yn Koch, J. T. (gol.), ''Celtic Culture: A Historical Encyclopedia'' (Santa Barbara a Rhydychen: ABC-Clio), tt. 1295–1296.<br /> <br /> Mac Eoin, G. (2013), ‘Karl Horst Schmidt’, ''Zeitschrift für celtische Philologie'', 60, 1, tt. 1–4. <br /> <br /> Ó Cuív, B. (1988), ‘Heinrich Wagner (1923–1988)’, ''Celtica'', 20, tt. 233–234.<br /> <br /> Zimmer, S. (2006), ‘Pokorny, Julius’, yn Koch, J. T. (gol.), ''Celtic Culture: A Historical Encyclopedia'' (Santa Barbara a Rhydychen: ABC-Clio), tt. 1451–1452.<br /> <br /> {{CC BY-SA}}<br /> [[Categori:Beirniadaeth a Theori]]</div>

RobertRhys