Gweld cod y dudalen Llewelyn-Jones, Iwan (g.1959)

__NOAUTOLINKS__
'''Mae'r cofnod hwn ymysg y cannoedd sydd i'w gweld yn [https://www.ylolfa.com/cynnyrch/9781784616250/cydymaith-i-gerddoriaeth-cymru''Cydymaith i Gerddoriaeth Cymru''], cyfrol gyhoeddwyd gan Y Lolfa ym mis Medi 2018.'''


Pianydd sy’n hanu o Amlwch, Ynys Môn. Fe’i hedmygir am gywreinrwydd ei berfformiadau, yn enwedig yn y ''repertoire'' Ffrengig, a gweithiau newydd gan gyfansoddwyr Cymreig. Astudiodd gerddoriaeth yng Ngholeg Balliol, Rhydychen, a’r Coleg Cerdd Brenhinol yn Llundain, lle dyfarnwyd iddo Wobr Chopin, Gwobr Deuawd Offerynnol a Medal Aur Hopkinson. Cafodd lwyddiant mewn cystadlaethau tramor yn Sbaen, Ffrainc a’r Eidal. Astudiodd hefyd gyda Noretta Conci a Cecile Ousset (g.1936). Daeth i sylw ar ôl ei gyngerdd llwyddiannus cyntaf yn Neuadd Wigmore yn 1987.

Mae’n hoff o chwarae cerddoriaeth gan Debussy a Ravel ac mae ei ddehongliad o ''Ondine'' gan yr olaf yn hynod synhwyrus. Nid cerddoriaeth o Ffrainc yn unig sy’n apelio ato, fodd bynnag, a chofir am ei chwe datganiad yn 2004 o weithiau gan Chopin. Yn 2001 rhyddhaodd gryno-ddisg o weithiau cyfansoddwyr Cymreig, ''Portreadau Cymreig'', gan ddilyn hyn ddeng mlynedd yn ddiweddarach gyda ''Caneuon Heb Eiriau'', lle bu’n trefnu ac addasu cerddoriaeth Gymreig a’i chyflwyno ar newydd wedd.

Ymhlith y cyfansoddwyr a ysgrifennodd ddarnau ar ei gyfer y mae [[Hoddinott, Alun (1929-2008) | Alun Hoddinott]], [[Jenkins, Karl (g.1944) | Karl Jenkins]], [[Jones, Richard Elfyn (g.1944) | Richard Elfyn Jones]], [[Lewis, Geraint (g.1958) |Geraint Lewis]], [[Metcalf, John (g.1946) | John Metcalf]] a [[Pickard, John (g.1963) | John Pickard]]. Yn 2005 dyfarnwyd iddo Wobr Syr [[Evans, Geraint (1922-92) | Geraint Evans]] gan Gymdeithas Cerddoriaeth Cymru am ei gyfraniad i gerddoriaeth yng Nghymru. Mae wedi perfformio lawer tro gyda [[Cerddorfeydd, Corau, Cerddorfeydd Ieuenctid ac Ensemblau | Cherddorfa Genedlaethol Gymreig y BBC]] mewn gweithiau gan Chopin, Litolff a Mozart, ac mae’n cyfrannu’n gyson i arlwy Radio 3, Radio Cymru ac S4C.

Bu hefyd yn weithgar ym maes cerddoriaeth mewn [[Diwylliant a'r Diwydiant Cerddoriaeth | addysg]], gan gyhoeddi nifer o werslyfrau (e.e. ap Siôn a Llewelyn-Jones 2011). Derbyniodd ddoethuriaeth am ddatganiad a thraethawd hir ar gerddoriaeth Ravel o Brifysgol Caerdydd yn 2016. Daeth yn aelod o staff adran gerddoriaeth [[Prifysgolion a Cherddoriaeth yng Nghymru | Prifysgol]] Bangor yn ystod yr un flwyddyn.

'''Richard Elfyn Jones'''

==Disgyddiaeth==

*''Portreadau Cymreig'' (Sain SCD2308, 2001)

*''Caneuon Heb Eiriau'' (Sain SCD2646, 2011)

==Llyfryddiaeth==

*Alun Guy ac Iwan Llewelyn-Jones, ''TGAU Cerddoriaeth – Llawlyfr y Myfyriwr'' (Llundain, 2009)

*Pwyll ap Siôn ac Iwan Llewelyn-Jones, ''Cyfansoddi Cerddoriaeth Gyfoes: Canllaw i Fyfyrwyr'' (Aberystwyth, 2011)

{{CC BY-SA Cydymaith}}
[[Categori:Cerddoriaeth]]