Hopkin, Deian (g.1944)
Mae'r cofnod hwn ymysg y cannoedd sydd i'w gweld yn Cydymaith i Gerddoriaeth Cymru, cyfrol gyhoeddwyd gan Y Lolfa ym mis Medi 2018.
Ganed Syr Deian Rhys Hopkin yn Llanelli ar 1 Mawrth 1944. Derbyniodd ei addysg gynnar yn ei dref enedigol cyn mynd i Goleg Llanymddyfri ar ysgoloriaeth. Graddiodd mewn Hanes o Brifysgol Cymru, Aberystwyth yn 1965. Ar ôl cyfnod byr yng Ngholeg Queen Mary, Llundain, dychwelodd i Aberystwyth, lle bu’n dysgu am 24 blynedd, gan ddod yn bennaeth adran. Bu hefyd yn diwtor yn y Brifysgol Agored.
Yn 1991 fe’i penodwyd yn Ddeon ym Mhrifysgol Guildhall Llundain (erbyn heddiw Prifysgol Metropolitanaidd Llundain). Fe’i gwnaed yn is-bennaeth y brifysgol yn 1996 cyn ei apwyntio’n Is-Ganghellor Prifysgol South Bank, Llundain rhwng 2001 a 2009. Bu ei waith yn bennaf ym maes polisïau addysg, ond mae’n bianydd jazz amryddawn, yn arbenigwr yn y maes, ac wedi perfformio am flynyddoedd gyda’i bedwarawd jazz y Deian Hopkin Quartet.
- Comisiynwyd y cofnod hwn ar gyfer Y Cydymaith i Gerddoriaeth Cymru, cyfrol a fydd yn cael ei chyhoeddi gan Y Lolfa yn 2018. Mae testun y cofnod hwn wedi’i ryddhau dan y drwydded Creative Commons BY-SA 4.0, sy’n eich caniatáu i’w ail-ddefnyddio a’i newid mewn unrhyw ffordd os ydych yn rhoi cydnabyddiaeth ar ffurf dolen i’r dudalen hon, ac yn trwyddedu eich fersiwn ddeilliadol yn yr un modd. Gweler testun y drwydded am ragor o fanylion.
